Në kompaninë Samsung shpërthen lufta për trashëgiminë !

Drejtuesi i gjigandit koreano-jugor, Samsung, Lee Kun-hee është paditur nga motra e tij. Lee Sook-hee ka paditur vëllanë 70 vjeçar në lidhjet me aksionet që u ka lënë trashëgim i ati.

Padia e saj vjen dy javë pasi dhe vëllai i madh Lee Maeng-hee ngriti një padi po për këtë çështje. Motra kërkon t’i kthehen 169 milion dollarë, kurse vëllai pretendon se i takojnë 623 milion dollarë.

Korrespondenti i BBC thotë se kjo histori është kthyer në një nga telenovelat më të ndjekura në vend.

Lee Kun-hee akuzohet e i ka mbajtur të gjitha aksionet për vete.

Babai i tyre, Lee Byung-chull, e themeloi kompaninë Samsung në vitin 1938 duke shitur peshk të tharë.

Tani grupi Samsung përfshin ndërtim anijesh, telekom, elektronikë dhe ndërtim. Xhiroja vjetore është 220 miliard dollarë.

Lee Kun-hee e mori presidencën nga i ati kur ai vdiq në vitin 1987. Megjithatë në vitin 2008 ai dha dorëheqje pasi u akuzua për evazion fiskal. Ai u dënua, por u fal në vitin 2009 me një falje presidenciale. Në vitin 2010 u rikthye të drejtojë kompaninë. Sipas Forbes, ai është njeriu më i pasur në Korenë e Jugut me 7.9 miliard dollarë pasuri.