Aleksandri i Madh vdiq nga konsumi i tepërt i verës

Aleksandri i Madh vdiq nga konsumi i tepërt i verës



Toksikologët dhe ekspertët e historisë antike të Universitetit të Otagos, në Zelandën e Re, kanë kryer një studimin bashkë me Universitetin e Birmingemit, mbi shkakun e vdekjes se Aleksandrit të Madh.

Për vite me radhë janë hedhur hipoteza të ndryshme për vdekjen misterioze të Aleksandrit të Madh në vitin 323 Para Erës së Re.

Një grup studiuesish pretendojnë se do të zbardhin misterin historik. Ata thonë se dashuria për verën i ka sjellë fundin tragjik perandorit 32-vjeçar që kishte mposhtur persianët e fuqishëm dhe kishte pushtuar gjysmën e botës në 13 vitet e fundit të jetës së tij.

Sipas studimit të ri të publikuar në revistën “Clinical Toxicology”, përgjatë banketeve të shumta të tij në Babiloni, Aleksandri, pasi kishte konsumuar sasi të mëdha alkooli kishte pirë verë që përmbante një substancë toksike të nxjerrë nga një lule e bardhë, që përdorej në antikitet me doza të vogla me besimin se dëbonte demonët nga trupi, duke shkaktuar teshtima dhe të vjella.

Ekspertët arritën në përfundimin se është pikërisht vera shkaktarja e vdekjes së parakohëshme të Aleksandrit të Madh.