Aksidenti që vrau një grua dhe ambiciet politike të Kennedyt

Aksidenti që vrau një grua dhe ambiciet politike të Kennedyt



Vetëm pak kohë pas një feste në Ishullin Chappaquiddick, Senatori Edward “Ted” Kennedy i Massachusettsit del nga një urë me makinën e tij Oldsmobile, dhe zhytet në një liqen të vogël.
Kennedy arriti të dalë nga makina e fundosur, por pasagjerja e tij, 28-vjecarja Mary Jo Kopechne nuk arriti. Senatori nuk e raportoi për dhjetë orë me radhë aksidentin fatal.
Mbrëmjen e 18 korrikut 1969, kur shumica e amerikanëve ishin në shtëpi duke parë lajmet në lidhje me progresin e misionit Apolli 11 në Hënë, Kennedy dhe kushëriri i tij, Joe Gargan po organizonin një festë në një shtëpi të marrë me qera në Ishullin Chappaquiddick, një ishull i pasur pranë Martha’sVineyard, në Massachusetts. Festa ishte planifikuar si një ribashkim i Kopechne dhe gjashtë grave të tjera, të gjitha veterane të fushatës presidenciale të presidentit të ndjerë, John F. Kennedy.
Bobby Kennedy kish qenë vëllai më i madh i Tedit dhe pas vrasjes së Bobbyt në qershor 1968, Ted mori pishtarin e familjes. Në vitin 1969, Ted Kennedy u zgjodh kryetar i shumicës në Senatin e SHBA, dhe ai mendohej se do të ishte kandidati kryesor për zgjedhjet presidenciale të vitit 1972.
Pak pas orës 11 të natës, Kennedy u largua nga festa bashkë me Kopechnen, sipas rrëfimit të tij për të mbërritur në portin e tragetëve ku do të merrnin një anije për të shkuar në banesat e tyre respektive në Martha’s Vineyard. Ndërkohë që udhëtonte në autostradën kryesore, Kennedy mori një kthesë të fortë në Dike Road, e cila ishte e pashtruar, eci dhe për një distancë të shkurtër dhe më pas doli nga rruga teksa ndodhej mbi një urë të ngushtë prej druri. Kennedy, atëherë i martuar, pretendoi se kthesa në Dike Road kishte qenë e gabuar. Megjithatë, edhe ai, edhe Kopechne kishin ecur më parë me makinë në të njëjtën rrugë, e cila të çonte në një plazh të shkretë në oqean pak përtej urës. Veç kësaj, Kopechne kishte lënë edhe çantën, edhe çelësin e dhomës në festë.
Kennedy doli nga makina dhe më pas u zhyt në një përpjekje për të shpëtuar Kopechnen nga Oldsmobili që fundosej. Duke mos ia dalë mbanë, u rikthye në vendin e festës, ku mori Garganin dhe një tjetër shok për të provuar sërish të shpëtonin Kopechnen. Ishin të pasuksesshëm; trupi i saj nuk u nxorr dot. Më pas, treshja shkoi në portin e tragetëve, ku Kennedy u hodh në ujë dhe notoi deri në Edgartown, afro një milje larg. Ai u kthye në dhomën e tij në Shiretown Inn, ndërroi rrobat dhe në orën 2.25 të mëngjesit, doli nga dhoma kur pikasi pronarin, Russell Peachey. I tha Peacheyt se e kishte zgjuar zhurma në derën ngjitur dhe e pyeti sa ishte ora. Më pas u kthye në dhomë.
A po përpiqej të krijonte një alibi? Në librin e Leo Damore “Privilegj senatorial”, autori risjell një intervistë me Joe Garganin, në të cilën Gargani pretendonte se Kennedy kish bërë plan që të bënte Kopechnen shoferen e makinës si dhe personin e vetëm që ndodhej në të. Cilatdo të kishin qenë qëllimet e Kennedyt, mëngjesin e 19 korrikut ai shkoi sërish në Ishullin Chappaquiddick dhe më pas u rikthye në Edgartown. Në orën 9.45 të mëngjesit, 10 orë pasi kish dalë nga rruga në urën e Dike Road, Kennedy raportoi aksidentin tek Shefi i Policisë së Edgartownit, Dominick Arena dhe pranoi se kishte qenë ai shoferi.
Në 25 korrik, Kennedy u shpall fajtor që ishte larguar nga skena e aksidentit, u dënua me dy muaj dhe iu hoq për një vit patenta. Atë mbrëmje, në një deklaratë në televizion, ai e quajti “të pambrojtshëm” raportimin e vonuar të aksidentit por mohoi që të ishte përfshirë në gjëra të pahijshme me Kopechne. U kërkoi gjithashtu zgjedhësve të tij që ta ndihmonin të vendoste në duhej ta vazhdonte karrierën politike. Pasi mori një përgjigje pozitive, Kennedy rimori detyrat e senatorit në fund të muajit.
Ka spekulime se Kennedy përdori ndikimin e tij të konsiderueshëm për të shmangur akuza më të rënda që mund të kishin rezultuar prej këtij episodi. Ndonëse aksidenti i Ishullit Chappaquiddick shkaktoi largimin prej ambicieve presidenciale, Kennedy vazhdoi të shërbejë si senator i Massachusettsit deri në shekullin 21. /history.com/